Um helgina fór fram alþjóðlegt fótboltamót í U17 aldursflokki kvenna sem ber nafnið Alsace Cup.
Mótið fór fram við franska bæinn Colmar sem stendur í norðaustur hluta Frakklands, við landamæri Þýskalands.
Blikastúlkum var boðið á mótið ásamt nokkrum af stærstu liðum Evrópu á borð við PSG, Lyon og FC Bayern og stóðu stelpurnar sig með stakri prýði.
Eftir að hafa unnið riðilinn sinn enduðu þær í fjórða sæti mótsins en þær slógu meðal annars PSG úr leik.
Breiðablik tapaði fyrir Lyon í undanúrslitum þar sem heimakonur skoruðu sigurmark undir lokin í 1-0 sigri og mættu Blikastúlkur þýska stórveldinu FC Bayern í úrslitaleik um þriðja sætið.
Þeim leik lauk með 1-1 jafntefli og hafði Bayern betur í vítaspyrnukeppni.
Kristrún Daðadóttir, Hilmar Sigurjónsson og Úlfar Hinriksson voru þjálfarar Breiðabliks á mótinu og var Hrafnhildur Ása Halldórsdóttir valin í úrvalslið mótsins.