Chelsea mun spila til úrslita á HM félagsliða en þetta varð ljóst eftir 2-0 sigur liðsins á Fluminense á MetLife-leikvanginum í New Jersey í kvöld.

Á dögunum festi Chelsea kaup á Joao Pedro frá Brighton og byrjaði hann fyrsta leik sinn gegn uppeldisfélagi sínu í Fluminense.

Sá sýndi stuðningsmönnum það sem er í vændum með tveimur stórglæsilegum mörkum.

Hann kom Chelsea á bragðið á 18. mínútu er hann fékk boltann fyrir utan teig og stýrði honum síðan rakleiðis efst í hægra hornið. Óverjandi.

Pedro ákvað að fagna ekki markinu af virðingu við uppeldisfélagið, sem var hans fyrsta mark í Chelsea-treyjunni.

Fluminense sýndi það nokkrum sinnum í leiknum að það getur vel veitt evrópsku liðunum samkeppni. Marc Cucurella bjargaði á línu frá Hercules, sem hafði setti boltann á milli fóta hjá Robert Sanchez.

Stuttu síðar flautaði dómarinn vítaspyrnu á Chelsea er hann taldi Trevoh Chalobah hafa handleikið boltann eftir aukaspyrnu. Dómaranum var sagt að fara að VAR-skjánum til að skoða atvikið betur og eftir smá umhugsun ákvað hann að taka dóminn til baka og útskýrði í hátalarakerfinu að hönd Chalobah hafi verið í náttúrulegri stöðu.

Chelsea fékk draumabyrjun í síðari hálfleiknum er Joao Pedro gerði annað glæsilegt mark.

Pedro fékk boltann úti vinstra megin, færði boltann á hægri og hamraði honum í slá og inn. Geggjuð mörk hjá Brasilíumanninum sem var ekki lengi að stimpla sig inn hjá Lundúnafélaginu.

Fluminense náði ekki að ógna marki Chelsea mikið síðustu mínútur leiksins og enska liðið því komið áfram í úrslitaleikinn þar sem það mætir annað hvort Paris Saint-Germain eða Real Madrid.