Stefán Ingi skoraði, en í þetta sinn var það því miður í eigið net
Markaskorarinn mikli Stefán Ingi Sigurðarson varð fyrir því óláni að setja boltann í eigið net í 2-1 tapi gegn toppliði Bodö/Glimt í norsku úrvalsdeildinni í dag.
Stefán hefur verið iðinn við kolann á tímabilinu og farinn að vekja athygli hjá stærri félögum um alla Evrópu.
Hann kom sér vissulega á blað í dag, en það var einn hængur á og það var að hann setti boltann í eigið net.
Staðan var 1-1 þegar tuttugu mínútur voru eftir. Bodö/Glimt fékk hornspyrnu sem Villad Nielsen skallaði í lærið á Zinedin Smajlovic, varnarmanni Sandefjord og á leið í átt að marki áður en Stefán Ingi, sem reyndi að hreinsa, setti hann óvart í eigið net sem reyndist síðan sigurmark gestanna.
Bodö/Glimt er áfram á toppnum með 45 stig en Sandefjord í 7. sæti með 28 stig.
Viðar Ari Jónsson spilaði fyrri hálfleikinn hjá Ham/Kam sem tapaði fyrir Sarpsborg, 3-1. Sveinn Aron Guðjohnsen lék síðasta hálftímann hjá Sarpsborg. Ham/Kam er í 13. sæti með 21 stig en Sarpsborg í 11. sæti með 25 stig.
Hilmir Rafn Mikaelsson lék þá síðustu tíu mínúturnar í 2-1 sigri Viking á Rosenborg. Viking fór aftur upp að hlið Bodö/Glimt á toppnum.
Davíð Snær Jóhannsson og Ólafur Guðmundsson byrjuðu báðir hjá Álasundi sem tapaði fyrir Egersund, 3-2, í B-deildinni í Noregi. Álasund er í 6. sæti með 32 stig.
Athugasemdir
