Það var nóg að frétta í dag hjá Íslendingunum sem leika erlendis þar sem Sigdís Eva Bárðardóttir kom inn af bekknum í sigri Norrköping í efstu deild sænska boltans.
Bryndís Arna Níelsdóttir kom einnig við sögu í 3-1 tapi Växjö á meðan Alexandra Jóhannsdóttir og Guðný Árnadóttir steinlágu á heimavelli með Kristianstad gegn AIK.
Þetta er skellur fyrir Kristianstad sem er sjö stigum frá þriðja sæti deildarinnar eftir þetta tap. Í næstefstu deild var Eyrún Embla Hjartardóttir í byrjunarliðinu hjá varaliði Häcken sem steinlá gegn Örebro.
FC Bayern vann þá úrslitaleik þýska Ofurbikarsins en Glódís Perla Viggósdóttir var ekki með. Lára Kristín Pedersen og stöllur í Club Brugge unnu þá æfingaleik gegn Feyenoord á meðan Ingibjörg Sigurðardóttir og stöllur í liði Freiburg gerðu jafntefli við Dijon.
Í næstefstu deild í Danmörku unnu Íslendingalið FC Kaupmannahafnar og Österbro sigra á heimavelli í þriðju umferð.
Að lokum var Marie Jóhannsdóttir á bekknum er Molde rúllaði yfir Start í næstefstu deild norska boltans. Molde er í harðri toppbaráttu um sæti í efstu deild, tveimur stigum á eftir toppliði Álasunds sem stendur.
Kristianstad 0 - 3 AIK
Malmö 3 - 1 Vaxjö
Pitea 1 - 2 Norrköping
Örebro 4 - 0 Hacken B
FC Bayern 4 - 2 Wolfsburg
Club Brugge 3 - 1 Feyenoord
Freiburg 1 - 1 Dijon
FC Kaupmannahöfn 3 - 0 Næstved
Österbro 1 - 0 AaB
Molde 4 - 1 Start
Athugasemdir
