Gylfi á æfingu með landsliðinu í gær.
Gylfi Þór Sigurðsson ræddi við fjölmiðla fyrir æfingu íslenska landsliðsins í Annecy í morgun. Evrópumótið fer af stað á morgun en Ísland á fyrsta leik gegn Portúgal á þriðjudag.
Við byrjuðum að spyrja Gylfa út í hvað hann vill sjá frá íslenska landsliðinu á þessu móti?
„Við viljum vinna einhverja leiki, það væri fínt. Við erum í erfiðum riðli og byrjum á mjög erfiðum leik gegn Portúgal. Það er þannig lagað séð engin pressa á okkur í fyrsta leik sem er gott. Það yrði algjör skandall ef Portúgal myndi tapa einhverjum stigum í þeim leik," segir Gylfi.
„Við verðum að verjast mjög vel og gera sömu hluti og við gerðum í undankeppninni."
„Umræðan hefur snúist um hversu fámenn við erum en það verða jafnmargir í báðum liðum í leiknum á þriðjudag. Við þurfum að spila mjög vel og berjast fyrir hvern annan. Við erum að fara að mæta mjög góðu sóknarliði með frábæra einstaklinga."
Telur Gylfi að hann þurfi að vera í meiri varnargír en sóknargír gegn Portúgal.
„Nei ég held ekki. Aron sér oftast um meiri hlutann af því. Við verðum að sækja eitthvað í leiknum. Þá þarf ég að taka þá ábyrgð að fara svolítið fram á við."
Viðtalið má sjá í heild í sjónvarpinu hér að ofan.
