Breki Baldurs byrjaði hjá Esbjerg
Framarinn Breki Baldursson komst áfram í danska bikarnum með Esbjerg er liðið vann nauman 2-1 sigur á Vejgaard í 2. umferðinni í dag.
Breki fékk tækifærið með Esbjerg og spilaði allan fyrri hálfleikinn.
Óveður setti sinn svip á leikinn og þurftu leikmenn að ganga til búningsherbergja í fyrri hálfleiknum. Þeir þurftu að hanga þar í tæpan klukkutíma áður en leikurinn fór aftur af stað.
Breki var tekinn af velli í hálfleik í stöðunni 1-0 áður en Vejgaard, sem leikur í D-deildinni, jafnaði óvænt metin.
Rétt eftir jöfnunarmarkið kom Benedikt Tristan Axelsson inn á hjá Vejgaard. Hann er uppalinn ÍR-ingur sem spilaði 4 leiki með U19 ára landsliði Íslands.
Hann samdi við Álaborg árið 2019 en fór frá félaginu til Vejgaard á síðasta ári.
Fimm mínútum fyrir leikslok náði Esbjerg að troða inn sigurmarki eftir mikinn darraðardans í teignum og þar við sat. Esbjerg er komið áfram í 3. umferðina og mætir þar Ringsted IF.
Athugasemdir
