Cecilía og Karólína eru komnar langleiðina í Evrópubikarinn
Landsliðskonurnar Cecilía Rán Rúnarsdóttir og Karólína Lea Vilhjálmsdóttir, sem leika með Inter á Ítalíu, eru komnar með annan fótinn í 2. umferð í forkeppni Evrópubikarsins eftir 4-1 sigur á Hibernian í Mílanó í kvöld.
Inter var sent í 1. umferð í forkeppni Evrópubikarsins eftir að hafa dottið út í forkeppni Meistaradeildar Evrópu.
Cecilía og Karólína voru báðar í byrjunarliði Inter sem fór nokkuð létt með Hibernian.
Inter fór með tveggja marka forystu inn í hálfleikinn og skoraði liðið tvö mörk til viðbótar í þeim síðari.
Karólína fór af velli á 61. mínútu leiksins á meðan Cecilía lék allan leikinn á milli stanganna.
Liðin mætast öðru sinni eftir viku á heimavelli Hibernian í Edinborg í Skotlandi. Sigurvegarinn fer áfram í 2. umferð Evrópubikarsins, sem má í raun kalla umspil um sæti í 16-liða úrslitin.
Athugasemdir
