„Maður heyrir að hann vill koma aftur til Íslands og það er búið að hlera nokkur félög. Það sem ég heyri er að FH sé í viðræðum við hann og mögulega fleiri félög," sagði Albert Brynjar Ingason í þættinum.

Samkvæmt heimildum Fótbolta.net þá hefur umboðsmaður Mikkelsen verið í sambandi við félög á Íslandi.

Mikkelsen, sem er 33 ára gamall, spilaði með Breiðabliki frá 2018 til 2021 og var á þeim tíma einn besti sóknarmaður Bestu deildarinnar. Hann hefur sannað það að hann getur svo sannarlega skorað mörk í deildinni hér heima.

Mikkelsen er núna á mála hjá Kolding í dönsku B-deildinni en hann hefur skorað sjö mörk í 18 deildarleikjum þar á tímabilinu. Samningur hans við félagið rennur út í sumar.