Daníel Tristan Guðjohnsen
Íslenski unglingalandsliðsmaðurinn Daníel Tristan Guðjohnsen er að ganga í raðir sænska félagsins Malmö en þetta segir Arnar Laufdal Arnarsson, fréttamaður Fótbolta.net, á Twitter í kvöld.
Daníel Tristan er yngsti sonur Eiðs Smára Guðjohnsen og Ragnheiðar Sveinsdóttur, en hann er fæddur árið 2006.
Hann er uppalinn á Spáni og spilaði með unglingaliði Barcelona áður en hann færði sig yfir til Real Madrid fyrir fjórum árum.
Arnar Laufdal segir frá því á Twitter að Daníel Tristan sé að ganga í raðir sænska úrvalsdeildarfélagsins Malmö og mun hann fljúga til Svíþjóðar í nótt og skrifa undir hjá liðinu á morgun.
Daníel á að baki sjö landsleiki fyrir U16 og U17 ára landslið Íslands og gert eitt mark.
Sveinn Aron, elsti bróðir Daníels, spilar með Elfsborg í Svíþjóð og þá er Andri Lucas á leið til Norrköping.
Milos Milojevic, fyrrum þjálfari Víkings og Breiðabliks, er þjálfari Malmö, sem situr í 5. sæti sænsku deildarinnar. Malmö mætir Víkingi R. á morgun í seinni leik liðanna í 1. umferð í forkeppni Meistaradeildar Evrópu.
Daníel Gudjohnsen til @Malmo_FF (Staðfest) 🇪🇸 🔜 🇸🇪 Flýgur til Svíþjóðar í nótt að skrifa undir hjá sænska stórveldinu🏆
— Arnar Laufdal (@AddiLauf) July 11, 2022
Athugasemdir
