KR vann Keflavík 2-0 í Pepsi-deildinni í kvöld en þessi sömu lið leika til úrslita í bikarnum næsta laugardag.
„Við komum sáttir inn í hálfleikinn, við áttum að vera búnir að skora. Seinni hálfleikur var langt í frá nægilega góður og við gefum þeim leikinn," sagði Kristján Guðmundsson, þjálfari Keflavíkur.
Þrír leikmenn liðsins sem voru á hættusvæði vegna spjalda voru utan hóps og engin áhætta tekin fyrir bikarúrslitaleikinn.
„Við erum settir í þá stöðu að spila tvo leiki fyrir aganefndarfund á morgun þar sem við erum með fjóra menn á spjaldi. Við létum þrjá þeirra spila á miðvikudaginn. Það var erfitt fyrir leikmennina."
„Þetta hafði gríðarleg áhrif á leikinn okkar á miðvikudaginn og þennan leik í dag. Félögin verða að finna leið í þessu og koma með tillögu á næsta KSÍ-þingi. Það er verið að tala um þetta ár eftir ár."
Hvernig ætlar Kristján að nýta þennan leik fyrir bikarúrslitin á laugardag?
„Ég ætla ekki að nýta þennan leik neitt. Ég ætla að henda honum. Ég er búinn að skamma strákana því seinni hálfleikur var ekki nægilega góður og of margir leikmenn sem tóku ekki þátt. Nú er þessi leikur búinn. Við ætlum að fara að skemmta okkur á laugardaginn."
Viðtalið má sjá í heild í sjónvarpinu hér að ofan.
