---

Leicester 1 - 2 Liverpool (12:30 í dag)
Gríðarlegur gambítur hér á ferð. Refurinn Vardy að komast á lappir og mun, í einhverri mynd, reyna að rífa sjúka vörn Liverpool í sig. En ólíkt Liverpool þá eiga Refir enn möguleika á titli heima fyrir og eyddu miklu púðri í vikunni að tryggja sig áfram í 8 liða úrslit bikars. Á sama tíma þarf Liverpool að vera með ferskar táslur fyrir einvígið við RB Leipzig á þriðjudaginn. Vafasamt Var tryggir Liverpool sigur í ömurlega leiðinlegum leik.

Crystal Palace 1 - 1 Burnley (15:00 í dag)
Burnley skeit duglega í bikar í vikunni gegn Bournemouth og hefur því einungis eitt verkefni fyrir stafni, að tryggja sæti sitt í deildinni. Það er samt kjánalegt að spá einhverju öðru en jafntefli.

Manchester City 5 - 2 Tottenham (17:30 í dag)
Síðasta skiptið sem að City tapaði leik var gegn Tottenham í nóvember á síðasta ári í leik sem þeir Morinhouðu yfir sig og urðu Englandsmeistarar í fyrsta skiptið í 60 ár. Hafa síðan verið meira og minna að Tottenhama sig. Þetta er ekki í síðasta skiptið sem City mun niðurlægja Tottenham á þessari leiktíð.

Brighton & Hove Albion 1 - 0 Aston Villa (20:00 í dag)
Við blasir að Aston Villa er eins og áfengissjúka frænkan í fjölskyldunni. Þú hefur litla hugmynd hvernig frænkan verður í næsta fjölskylduboði. Það kæmi ekki á óvart að það væri þungt í henni að þessu sinni.

Southampton 2 - 0 Wolves (12:00 á morgun)
Fimm tapleikir í röð í deildinni hjá Dýrlingum en smelltu Úlfunum úr bikar í vikunni. Saltið í sárið hjá Úlfum þessa vikuna verður annar sambærilegur skellur.

West Brom 1 - 0 Manchester Utd (14:00 á morgun)
Það vita það allir að Man. Utd er að fara landa þessu með tveimur til þremur mörkum en það er bara svo ógeðslega leiðinlegt að henda slíkri spá fram. Hér fórnum við okkur fyrir málstaðinn og sláum í veislu fyrir alla sem hata Man. Utd.

Arsenal 3 - 3 Leeds (16:30 á morgun)
Það er ekkert annað í hendi en að hér verði stuð á balli. Það eru alltaf mörk í leikjum Leeds ef frá er talinn einn leikur, einmitt þegar þessi lið mættust á Elland í nóvember. Ég ætla að setja 12 þúsund krónur á að leikurinn fari 3-3

Everton 2 - 0 Fulham (19:00 á morgun)
Góður nagli í fallkistu Fulham og fátt annað að segja um þennan mjög svo óáhugaverða leik. Mögulega leiðinlegasta leik á Englandi þessa vikuna, ef frá er talinn viðbjóðslegi gjörningurinn sem á sér stað þegar Skítfuglinn fær Stoke í heimsókn.

West Ham 2 - 2 Sheff. Utd. (18:00 á mánudag)
Þetta er leikur. Það verður að gefa Sheffield það að í síðustu leikjum hafa þeim verið að gefa liðum alvöru leiki. Komnir í 8-liða úrslit í bikar, vita að þeir eru á leiðinni niður og eru bara á góðum stað í lífinu.

Chelsea 3 - 0 Newcastle (20:00 á mánudag)
Engar áhyggjur af þessum leik. Það er ekkert að koma í veg fyrir þessi úrslit. Ég er mjög næmur þessa dagana og því gott að geta miðlað því áfram.

Fyrri spámenn
Tómas Þór Þórðarson - 8 réttir
Haukur Harðarson - 7 réttir
Siggi Bond - 7 réttir
Auðunn Blöndal - 6 réttir (Einn frestaður)
Bjarni Þór Viðarsson - 6 réttir
Björn Bragi Arnarsson - 6 réttir
Sóli Hólm - 6 réttir
Gummi Ben - 5 réttir
Logi Bergmann Eiðsson - 5 réttir
Sara Björk Gunnarsdóttir - 5 réttir
Sölvi Tryggvason - 5 réttir
Elísa Viðarsdóttir - 4 réttir
Þorlákur Árnason - 4 réttir
Gunnar Birgisson - 4 réttir
Kristján Óli Sigurðsson - 4 réttir
Bára Kristbjörg Rúnarsdóttir - 3 réttir (einn frestaður)
Birkir Már Sævarsson - 3 réttir
Brynjólfur Andersen Willumsson - 3 réttir
Herra Hnetusmjör - 3 réttir
Ingibjörg Sigurðardóttir - 3 réttir
Steindi Jr. - 3 réttir
Villi í Steve Dagskrá - 3 réttir