„Þetta er besta tilfinning í heimi að fá bikarinn og vera komnir í Evrópukeppnina á næsta ári," sagði fyrirliði ÍBV, Sindri Snær Magnússon eftir 1-0 sigur á FH í bikarúrslitum í dag.
Lestu um leikinn: ÍBV 1 - 0 FH
„Þetta hefur tvisvar sinnum verið helvíti súrt og í fyrra var þetta helvíti súrt að fara í bátinn og fara heim og valda öllu þessu frábæra fólki vonbrigðum. Þetta var geggjað í dag," sagði Sindri Snær.
Leikmenn ÍBV tóku síðustu helgi rólega þrátt fyrir stærstu helgi ársins í Vestmannaeyjum, þegar Þjóðhátíð stóð yfir.
„Við fórum snemma í bólið alla síðustu helgi og það er þess virði. Við ætlum að halda okkar eigin Þjóðhátíð. Við ákváðum það fyrir Þjóðhátíðina að fara fyrr heim á kvöldin og halda okkar eigin Þjóðhátíð í kvöld."
Sindri var ánægður með fyrri hálfleikinn.
„Fyrri hálfleikurinn var frábær. Seinni hálfleikurinn var ekki eins góður, mér fannst við halda boltanum vel í þeim fyrri og gáfum FH-ingum engan tíma á boltann. Í seinni hálfleik dettum við full aftarlega en aftur á móti fáum við þrjú bestu færi seinni hálfleiksins undir lokin þegar við erum einir gegn markmanni. Game-planið gekk þokkalega vel upp," sagði fyrirliði ÍBV.
Viðtalið í heild sinni má sjá í sjónvarpinu hér að ofan.
Athugasemdir
