Í Innkastinu var opinberað val á leikmanni 21. umferðar Bestu deildarinnar, í boði Steypustöðvarinnar.

Vuk Oskar Dimitrijevic skoraði tvö mörk og var nálægt þrennunni þegar FH slátraði ÍA 6-1 í gær.

„Ég fékk bara gæsahúð við að sjá svipmyndir úr þessum leik í gær. Sjá Vuk í þessum ham, hreyfingarnar hjá honum. Eitthvað sem FH-ingar hafa varla fengið að sjá en þarna var hann bara kominn í gírinn þegar hann var bara óstöðvandi með Leikni í Lengjudeildinni. Það er svo mikil fótboltafegurð að horfa á hann spila," segir Elvar Geir Magnússon í Innkastinu.

„Ef hann fær traustið áfram þá getur hann byggt á þessu út tímabilið og haldið svona áfram á næsta tímabili. Ef hann fær traustið áfram þá held ég að hann geti verið farinn út eftir næsta tímabil," segir Guðmundur Aðalsteinn Ásgeirsson en Vuk er 21 árs gamall.

Guðmundur skrifaði um leikinn fyrir Fótbolta.net og tók viðtal við Vuk sem sjá má hér að neðan. Vuk er ekki maður margra orða og það þurfti að hafa fyrir því að fá hann í viðtal.

„Eftir leik lét Vuk bíða eftir sér og var eitthvað að fela sig inni í klefa en Tómas Meyer fjölmiðlafulltrúi FH græjaði þetta og náði í hann. Tómas Meyer stóð við stóru orðin og Vuk var virkilega flottur í þessu viðtali," segir Guðmundur.