Ólafur Ingi Skúlason er einn þeirra sem til greina koma í stöðu hægri bakvarðar í leiknum gegn Króatíu á föstudag.
„Við erum nokkrir sem getum spilað þessa stöðu. Við förum í gegnum æfingarnar og sjáum hvernig þetta lítur út. Svo taka þjálfararnir ákvörðun. Aðalatriðið er náttúrulega að menn séu klárir og liðið í heild eins sterkt og mögulegt er," segir Ólafur sem er klár ef hann verður valinn til að spila hægri bakvörðinn.
„Það er ekki spurning. Maður hefur spilað hægri bakvörð áður og þekki þessa stöðu ágætlega. Ég er ekki að spila hana með félagsliði mínu en ég er spenntur."
Hvernig skynjar hann væntingar þjóðarinnar?
„Ég held að þjóðin viti alveg að þetta verði erfitt en ég hugsa að allir hafi trú á að við getum þetta. Við höfum það líka. Við finnum jákvæða strauma."
