Þar var De Zerbi meðal annars spurður út í eina skærustu stjörnu Chelsea liðsins, Cole Palmer sem var keyptur frá Manchester City síðasta sumar.

Chelsea borgaði rúmlega 40 milljónir punda fyrir Palmer sem hefur reynst algjör lykilmaður og verið iðinn við að skora og leggja upp mörk. Hann er kominn með 21 mark og 10 stoðsendingar í 31 deildarleik frá félagsskiptunum í september.

„Við reyndum að kaupa hann síðasta sumar, við höfðum mjög mikla trú á honum. Hann er að spila mjög vel á þessu tímabili. Gæðin hans eru öllum augljós í dag, en þau voru það ekki þegar hann var ennþá hjá Man City," sagði De Zerbi.

„Palmer býr yfir verulega miklum gæðum. Hann getur skapað okkur vandræði á morgun því hann byrjar kannski úti á kanti en svo kemur hann inn á völlinn og spilar líka sem tía. Það er mjög erfitt að eiga við hann."