Palli var alls ekki sáttur við varnarleikinn í kvöld
Magni tapaði 5-3 fyrir Þrótti á Eimskipsvellinum í einum skemmtilegasta leik sumarsins í kvöld í Inkassó-deild karla. Páll Viðar Gíslason sagði lið sitt kasta leiknum frá sér á fyrstu mínútum leiksins.
Lestu um leikinn: Þróttur R. 5 - 3 Magni
„Tilfinningin er aldrei góð þegar maður tapar, það breytist ekkert í þessum leik. Við stútum þessum leik á fyrstu mínútunum, þeir skora í hvert skipti sem þeir komast inn í teig. Þetta er svolítið saga okkar á útivelli í sumar, við lekum inn mörkum á fyrstu mínútunum og ætlum svo að fara að þrífa upp eftir okkur"
Gunnar Örvar var tekinn niður inn í teig í stöðunni 1-0 en engin vítaspyrna var dæmd. Páll sagði að hlutirnir væru ekki að detta með Magna en sagði að þeir gætu ekki ætlast til þess þegar þeir kasta frá sér leikjum trekk í trekk.
„Það hefði komið á fínum tíma, þá hefðum við komist inn í leikinn en það er ekkert að detta með okkur heldur. Það er ekki hægt að ætlast til þess þegar við erum alltaf að kasta frá okkur leikjum á útivelli."
Allir leikir sem eftir eru hjá Magna eru að sögn Páls hálfgerðir úrslitaleikir fyrir þá.
„Við erum búnir að vera í fallsæti frá upphafsflauti svo allir leikir hvort sem þeir eru heima eða úti eru úrslitaleikir fyrir okkur, við þurfum að vinna nokkra leiki í viðbót og það væri ekki verra ef eitthvað kæmi á útivelli."
Magni fær Leikni í heimsókn næstu helgi og segir Páll að það sé ekkert annað en sigur sem komi til greina.
„Það er bara do or die, það er bara þannig.
Athugasemdir
