Sveindís hefur skorað þrjú og lagt upp tvö í fyrstu þremur deildarleikjunum
Sveindís Jane Jónsdóttir er í þrumustuði með Angel City í NWSL-deildinni í Bandaríkjunum en hún skoraði glæsimark er liðið vann Houston Dash, 2-1, í nótt.
Íslenska landsliðskonan hefur komið að fjórum mörkum í síðustu þremur leikjum sínum með Angel City og virðist ekkert geta stöðvað hana.
Angel City var 1-0 undir gegn Houston í hálfleik, en Sveindís kom liðinu aftur inn í leikinn stuttu eftir hálfleikinn með frábæru marki í samskeytin vinstra megin þegar boltinn datt fyrir hana eftir hornspyrnu.
Sveindís fagnaði markinu af mikilli innlifun og var stálheppin að meiðast ekki en hún lenti illa í fagninu. Sem betur fer fór allt vel og kom hún meira að segja að sigurmarkinu. Hún fékk boltann á hægri vængnum, keyrði inn á miðju vallarins og færði hann á samherja. Í kjölfarið var boltanum komið út hægra megin og inn á teiginn þar sem Maiara Niehues var mætt til að stanga boltann í bakið á varnarmanni Dash og á Riley Tiernan sem kom honum yfir línuna.
Stórkostleg byrjun á tímabilinu hjá Angel City sem hefur unnið alla þrjá leiki sína til þessa og er Sveindís markahæst í deildinni ásamt þeim Barbra Banda og Melissu Kossler.
Jonsdottir thats insane man fairs https://t.co/Jd1EpAaQnT pic.twitter.com/dMMhfqoFGw
— CAPTCHA ???? (@FootyFilmzz) March 28, 2026
Athugasemdir
