Ágúst var í bleiku peysunni að vanda
„Við erum að fá gríðarlega sterkt lið hérna á heimavöll og þeir setja á okkur mark, komast í 1-0. Það er mjög erfitt að snúa blaðinu við en það gerðum við í dag,“ sagði Ágúst Gylfason eftir 3-1 sigur sinna manna á móti KR.
Lestu um leikinn: Fjölnir 3 - 1 KR
Martin Lund Pedersen og Guðmundur Karl Guðmundsson hafa oft leikið betur en í kvöld og fannst Ágústi KR byrja betur. „KR-ingar voru yfir í báráttunni fannst mér. Þeir komu sterkir hérna til leiks og settu mark á okkur. Við þurftum að gera eitthvað í hálfleiknum klárlega til að rífa aðeins menn upp og vera tilbúnir í baráttuna. Og við gerðum það og mér fannst seinni hálfleikurinn allt annar.“
Með sigrinum komst Fjölnir á toppinn og var Ágúst ánægður með það. „Við erum kannski að sjá það núna að það er okkar tilvera að vera í toppbaráttunni og við erum í góðu sæti núna og það er ágætis frí þannig að við allavega njótum þess á meðan það er.“
Leiktíminn hafði verið svolítið gagnrýndur enda fáir Íslendingar með hugann við Pepsi deildina sem stendur. „Það eru 627 á vellinum, ef þessi leiktími hefði ekki verið hefði ég búist við 1500 manns. En hvað með það. Við fengum þrjú stig í dag og það er það sem skipti mestu máli.“
