Ólafur Þórðarson ætlar að ná markmiðum formanns Víkings og gera liðið að Íslandsmeisturum 2014.
,,Þrjú stig og fjögur mörk í fyrsta leik, og það er bara miður janúar, við erum bara sæmilega sáttir með það," sagði Ólafur Þórðarson þjálfari Víkings eftir 4-1 sigur á Þrótti í Reykjavíkurmótinu í kvöld.
,,Hópurinn er að styrkjast. Það vantaði nokkra í dag og svo erum við að vinna í að styrkja hópinn frekar. Það vantar á miðjuna og framar á vellinum," sagði Ólafur en Pape Mamadou Faye var ekki með í dag enda nýlega kominn úr aðgerð.
,,Við erum að vona að við getum farið að nota hann í mars en það kemur í ljós. Hann var í erfiðri mjaðmaaðgerð og hann þarf að vera skynsamur ef það á að takast. Svo vantar Viktor Jónsson líka og Aron Elís. Það vantaði nokkra spræka stráka í liðið."
Ólafur segist ætla að styrkja liðið frekar og ljóst að ekki er eftir miklu að sækjast hér heima. Er hann að horfa út?
,,Jájá, það er bara úti. Allar styrkingar innanlands eru löngu farnar í einhver önnur lið. Það var umtalað að við þyrftum að bæta við fjórum eða fimm mönnum í byrjunarliðið til að halda okkur uppi í úrvalsdeild. Það er bara þannig og það hefur sýnt sig á síðustu árum að ansi mörg af þessum liðum sem hafa komið upp hafa farið beint niður aftur. Það er einfaldlega því þau hafa ekki verið nógu sterk."
,,Við stefnum á að stabilísera þennan klúbb í efstu deild aftur," sagði Ólafur en Björn Einarsson formaður Víkings tilkynnti í áramótakveðju í lok ársins 2010 að stefnt væri að því að Víkingur yrði besta félag landsins árið 2014. Er þá ekki stefnt að titlinum?
,,Jújú, og þrátt fyrir skemmtileg markmið formannsins setur maður sér alltaf það markmið að vinna allt sem maður tekur þátt í. Við stefnum á að vinna deildina en hvort það tekst kemur í ljós í september."
Sjá einnig:
,,Víkingur verður besta knattspyrnulið Íslands eigi síðar en 2014''
