Enski miðjumaðurinn Curtis Jones verður að öllum líkindum klár með Liverpool er liðið fær Everton í heimsókn í grannaslag í fimmtu umferð ensku úrvalsdeildarinnar á laugardag.
Jones var ekki með í 1-0 sigri Liverpool á Burnley um helgina vegna meiðsla sem hann varð fyrir í leiknum gegn Arsenal fyrir landsleikjahlé.
Arne Slot, stjóri Liverpool, segir Jones færast nær endurkomu, en hann var hins vegar ekki með gegn Atlético Madríd í Meistaradeildinni í gær.
„Hann mun æfa með hópnum á morgun og vonandi í hópnum á laugardag,“ sagði Slot.
Liverpool hefur unnið alla fjóra deildarleiki sína á tímabilinu, en leikurinn gegn Everton verður sömuleiðis fyrsti deildarleikur sænska framherjans Alexander Isak með þeim rauðu.
Athugasemdir
