AS Roma tók á móti skemmtilegum nýliðum Benevento og úr varð fjörugur leikur þar sem gestirnir tóku forystuna snemma leiks þegar skot Gianluca Caprari fór af varnarmanni og í netið.

Pedro, fyrrum leikmaður Chelsea og Barcelona, jafnaði fyrir Rómverja og kom Edin Dzeko heimamönnum yfir. Henrikh Mkhitaryan kom knettinum einnig í netið en markið ekki gilt vegna rangstöðu og staðan 2-1 í hálfleik.

Gianluca Lapadula jafnaði eftir leikhlé þegar hann fylgdi eigin vítaspyrnu eftir. Antonio Mirante gerði vel að verja vítaspyrnuna en Lapadula var snöggur að hirða knöttinn aftur.

Jordan Veretout kom Roma yfir á nýjan leik með marki úr vítaspyrnu áður en Dzeko og Carles Perez gerðu út um leikinn.

Roma er með sjö stig eftir fjórar umferðir. Benevento er með sex stig.

Nýliðar Benevento hafa komið skemmtilega á óvart undir stjórn Filippo Inzaghi.