Breiðablik styrkti stöðu sína aftur á toppi Bestu deildarinnar með sigri á Fram í kvöld.

„Þessi fyrri hálfleikur fer ekki í sögubækurnar fyrir skemmtanagildi. Blikar heilt yfir betri en engir svakalegir yfirburðir," skrifaði Þorsteinn Haukur Harðarson í beinni textalýsingu frá leiknum.

Það hefur verið mikið rætt og skrifað um að Bikar séu þreyttir, en þeir sýndu styrk sinn í seinni hálfleiknum og kláruðu leikinn með sigri.

Sölvi Snær Guðbjargarson kom Blikum yfir með fínu skoti og svo gekk fyrirliðinn Höskuldur Gunnlaugsson frá leiknum með öðru marki eftir að Fram hafði misst Jesus Yendis af velli með rautt spjald.

Lokatölur 2-0 og eru Blikar áfram með sex stiga forskot á toppnum. Fram er í sjöunda sæti með 22 stig.