„Ég held þetta hafi verið bráðskemmtilegur leikur, erfiður, sérstaklega í fyrri hálfleik á móti vindi. Við gerðum margt frábærlega þó að við höfum verið undir og FH hrikalega orkumiklar. Í seinni var þetta barningur og við náðum að þrýsta inn marki í restina," segir Aðalsteinn Jóhann Friðriksson - Alli Jói - þjálfari Þórs/KA eftir jafntefli gegn FH í 1. umferð Bestu deildarinnar í dag.
Lestu um leikinn: Þór/KA 1 - 1 FH
Þór/KA skoraði jöfnunarmarkið undir lokin og tók stig út úr leiknum.
„Við erum hamingjusöm með þetta stig eftir að hafa lent undir."
„Ég hélt að vorbragur væri dautt hugtak í íslenskum fótbolta, ég veit það ekki, þetta er eins og þetta er, við erum að spila á glæsilegum velli og ég held það sé ekki rétt (að það hafi verið vorbragur). Þetta voru tvö góð lið að berjast og slást og mögulega voru taugar hjá báðum liðum," segir Alli Jói.
