Málfríður Anna Eiríksdóttir, fyrirliði Vals var ánægð með sigurinn í dag
Málfríður Anna Eiríksdóttir, fyrirliði Vals, var ánægð eftir 2-1 sigur á nýliðum Grindavíkur/Njarðvíkur á Hlíðarenda í fyrstu umferð Bestu deildarinnar.
„Bara frábær tilfinning að vinna. Við áttum alveg erfitt uppdráttar á löngum köflum í þessum leik og yndisleg tilfinning þegar dómarinn flautaði. Að ná í fyrsta sigur sumarsins í fyrsta leik er nákvæmlega eins og við viljum byrja,“ sagði Málfríður eftir leik.
Lestu um leikinn: Valur 2 - 1 Grindavík/Njarðvík
Hún viðurkenndi að frammistaðan hefði ekki alltaf verið upp á sitt besta, en liðið hefði sýnt karakter þegar mest á reyndi.
„Við reyndum að stíga aðeins upp í þær í seinni hálfleik og fara upp með baráttuna. Þetta var kannski ekki neinn stórkostlegur fótboltaleikur, en eftir að við náðum að skora mark númer tvö fannst mér við bara sýna karakter og sigla þessu heim.“
Valur hefur gengið í gegnum breytingar frá síðasta tímabili, en samkvæmt fyrirliðanum er liðið á góðum stað.
„Stemningin er mjög góð og ég held að þessi sigur gefi okkur rosalega mikið sjálfstraust. Við erum búnar að vera að finna okkur sem hóp í allan vetur og ég held að við séum bara á mjög góðum stað.“
Hún hafði einnig orð á frammistöðu nýliðanna sem hún telur geta komið á óvart í sumar.
„Það hlýtur að vera ótrúlega erfitt að spá í þessa deild og eins og Grindavík/Njarðvík sýndu, þá fannst mér þær virkilega sterkar. Þær gætu komið fólki á óvart og ég held að þetta verði bara ansi jafnt.“
Sjáðu viðtalið í heild í spilaranum hér að ofan
