„Þeir skora úr sínum tveimur sénsum. Við sköpum færi til að skora en setjum hann ekki og það kostar," sagði Indriði Sigurðsson eftir 2-1 tap KR gegn Selfyssingum í 32-liða úrslitum Borgunarbikarsins í kvöld.
KR fær Val í heimsókn í Pepsi-deildinni á sunnudag og Indriði segir að ekki sé hægt að dvelja of lengi við leikinn í kvöld.
„Það sem er fínt er að það er leikur á sunnudaginn þannig að þú hefur ekki tíma til að svekkja þig. Þú þarft að byrja upp á nýtt og Íslandsmótið er ennþá í gangi og það er forgangsröðun númer eitt. Við þurfum að einbeita okkur að því."
Byrjun KR-inga hefur verið brösótt í Pepsi-deildinni og nú er liðið úr leik í Borgunarbikarnum.
„Þú þarft engan stjarneðlisfræðing til að sjá að við erum ekki ánægðir með stigin sem við höfum fengið. Í einhverjum leikjum hefðum við kannski mátt fá meira. Sex stig í fimm leikjum er of lítið en það er nóg eftir. Það eru ennþá fimmtán leikir eftir en við þurfum að fara að byrja að vinna leiki."
Hér að ofan má sjá viðtalið í heild sinni.
