Nokkur ný lið koma til leiks í bikarkeppni KSÍ í ár og þar á meðal eru bjarnarliðin Ísbjörninn og Björninn.
Fjölnir hefur stofnað ,,B-lið" undir nafninu Björninn en það nafn er fengið lánað frá Skautafélaginu Birninum.
Undanfarin tvö ár hefur verið annað lið í utandeildinni sem heitir Björninn. Það lið ákvað að taka þátt í bikarnum í ár en þar sem nafnið Björninn var upptekið mun liði heita Ísbjörninn.
,,Við höfum spilað í utandeildinni undir merkjum Bjarnarins. Við ætluðum að skrá okkur í bikarinn undir því nafni en þá var íshokkíliðið búið að setja inn lið þannig að við þurfum að breyta nafninu. Við ákváðum þá að hafa þetta létt og laggott og létum liðið heita Ísbjörninn," sagði Hafþór Karlsson einn af stofnendum Ísbjarnarins við Fótbolta.net í dag.
Ísbjörninn mætir KFG í fyrstu umferð bikarsins en sigurvegarinn úr þeim leik mætir ÍA í annarri umferðinni. Björninn mætir aftur á móti KFS á útivelli í fyrstu umferð en sigurvegarinn þar fær Létti eða Víking Ólafsvík í annarri umferð.
