Aron Einar Gunnarsson, leikmaður Coventry, varð fyrir óskemmtilegri lífsreynslu í gærkvöldi þegar brotist var inn til hans. Valtýr Björn Valtýsson tók viðtal við Aron Einar í þættinum Mín Skoðun á X-inu 97,7 í dag.
,,Ég var ekki heima og síðan kem ég heim og lít inn í eldhús þá eru gluggatjöldin niðri. Þá hugsaði ég með mér 'nú hefur einhver farið í gegnum húsið mitt," sagði Aron Einar í þættinum.
,,Síðan skoðaði ég herbergið mit uppi og þá var Playstation tölvan farin, úrin öll, nokkrar símar sem ég átti, tölvan og allt. Þeir hafa dottið í feitan í gær. Þeir tóku allt sem var verðmætt í húsinu. Þetta er leiðinlegt en svona er þetta bíó."
Ræningjarnir skoðuðu einnig launaseðla Arons en miðjumaðurinn sterki segist þakka fyrir að hafa ekki verið heima þegar þeir létu til skarar skríða.
,,Ég er þakklátur fyrir að hafa ekki verið heima þegar þeir komu því þeir opnuðu gluggann með skrúfjárni og maður veit aldrei hvað getur gerst ef þeir eru í slæmu ástandi ræningjarnir. Þeir tóku þessa dauðu hluti en það er gott að ég var ekki heima og lenti ekki í veseni."
Aron Einar býst við að flytja eitthvert annað eftir þessa óskemmtilegu reynslu í gær.
,,Ég held ég komi mér í burtu héðan því þetta er mjög óþægilegt. Ég hugsa að ég borgi eitthvað eins meira til að komast í betra hverfi. Vonandi lendir maður ekki í þessu aftur," sagði Aron í viðtali í Mín Skoðun í dag.
Hér að ofan má hlusta á viðtalið við Aron í heild sinni.
