Ólafur Íshólm Ólafsson markvörður Fram er leikmaður umferðarinnar fyrir frammistöðu sína í 4-1 sigri gegn Val síðasta sunnudag. Þó sá leikur tilheyri í raun umferðinni á undan þá er leikjauppröðunin smá brengluð núna í kringum Evrópuleikina og við aðlögum okkur að því.

„Hélt sínum mönnum algjörlega á floti í seinni hálfleik með vörslu eftir vörslu eftir vörslu..." skrifaði Matthías Freyr Matthíasson fréttamaður Fótbolta.net um frammistöðu Ólafs í leiknum gegn Val.

„Við vorum stálheppnir í seinni hálfleik og Ólafur Íshólm var frábær og menn hentu sér fyrir allt og Óli varði allt það sem kom á markið og gerði ofboðslega vel," sagði Rúnar Kristinsson þjálfari Fram eftir leikinn.

„Þetta er eitthvað sem við trúðum á að við gætum gert og búnir að hafa nægan tíma til að setja upp leikinn. Það eru hvað, sautján dagar frá síðasta leik þannig að við erum búnir að ná að taka nokkra fundi og kortleggja þá. Bara gríðarlega ánægður með sigurinn og loksins farnir að spila aftur," sagði Ólafur Íshólm sjálfur eftir leik.

Ólafur Íshólm varði stórkostlega frá Gylfa???? #bestadeildin pic.twitter.com/ffyO7Po36s

— Besta deildin (@bestadeildin) July 29, 2024