Sterkastur í 11. umferð - Kom af bekknum og setti á sig skikkju

KA vann lífsnauðsynlegan sigur gegn Fram í 11. umferð Bestu deildarinnar. Daníel Hafsteinsson kom af bekknum og setti á sig skikkju, hann var hetjan KA og tryggði sínu uppeldisfélagi ofboðslega mikilvæg stig.

Fram var 2-1 yfir þegar Daníel kom inn á 59. mínútu. Hann skoraði tvívegis og gerði það að verkum að KA vann 3-2 endurkomusigur.

Með sigrinum náði KA að koma sér úr neðsta sæti deildarinnar.

„Þetta var draumi líkast, það er gaman að setja svona sigurmark og við erum helvíti ánægðir með þetta, loksins dettur eitthvað með okkur," sagði Daníel í viðtali sem sjá má í heild hér að neðan.