Tryggvi Hrafn Haraldsson var valinn sterkasti leikmaður 9. umferðar í Bestu deildinni en valið var í Innkastinu núna áðan. Tryggvi skoraði tvennu í Vesturbænum og var virkilega líflegur.

„Tryggvi skoraði tvö geggjuð mörk en þau hefðu hæglega getað verið fleiri. Flott dagsverk hjá Tryggva engu að síður," sagði Kári Snorrason í skýrslu sinni frá leiknum.

Rætt var um frammistöðu Tryggva í Innkastinu. „Það vantar tvo af þeirra bestu mönnum en þá stíga aðrir upp. Tryggvi Hrafn er farinn að spila eins og hann gerði í fyrra," sagði Valur Gunnarsson.

„Það er ótrúlega jákvætt að Tryggvi sé kominn á blað og sé kominn í gang. Hann er búinn að vera frábær," sagði Haraldur Árni Hróðmarsson.

Skagamaðurinn Sverrir Mar Smárason var ánægður með það á X að sjá Tryggva standa sig svona vel en hefði viljað að hann myndi bíða aðeins með það. „Andskotinn það er kviknað á Tryggva nágranna, ætlaði að fá hann heim á Skagann í júlí," skrifaði Sverrir léttur.

„Öfunda engan ungan mann sem lendir í the revenge tour hjá Tryggva nágranna."

Valsmenn hafa litið vel út að undanförnu en það stefnir í þriggja liða baráttu á toppnum á milli Víkings, Vals og Breiðabliks. Hægt er að hlusta á Innkastið í heild sinni hér fyrir neðan.

   04.06.2024 13:35

Sterkasta lið 9. umferðar - Deila titlinum og tveir í þriðja sinn

Andskotinn það er kviknað á Tryggva nágranna, ætlaði að fá hann heim á skagann í júlí

— Sverrir Mar Smárason (@Sverrirsmarason) June 3, 2024