„Ef Liverpool býður Xabi Alonso starfið tel ég að það yrði brjálæði hjá honum að taka því ekki. Ég tel að það sé ekki til betra tækifæri eða betra starf laust í sumar en Liverpoool," segir þýski blaðamaðurinn Raphael Honigstein.

„Þrátt fyrir allt sem fylgir því að taka við eftir arfleifð Jurgen Klopp þá verður hann með frábæran leikmannahóp sem er samkeppnishæfur í allar keppnir."

„Af hverju ætti hann ekki að taka því? Eina skýringin væri sú að honum þætti sem hann þyrfti meiri tíma til að læra inn á starfið, taka fyrst þátt í Meistaradeildinni. En ég held að hann muni alltaf taka þessu starfi ef það býðst því þó ekki sé allt fullkomið hjá Liverpool þá er stöðugt umhverfi undir FSG."

Alonso var í uppáhaldi stuðningsmanna sem leikmaður Liverpool og skoraði í sigri liðsins í úrslitaleik Meistaradeildarinnar 2005. Stjóraferill hans fer vel af stað og Bayer Leverkusen er á toppi þýsku Bundesligunnar og í útsláttarkeppni Evrópudeildarinnar.

Þegar hann tók við Leverkusen í október 2022 var liðið í næst neðsta sæti eftir átta umferðir í Þýskalandi. Aðeins 26 leikjum síðar endaði liðið í sjötta sæti og náði í Evrópu.