Kiernan Dewsbury-Hall

Mynd: EPA

Það var mikil dramatík þegar West Brom fékk Leicester í heimsókn í Championship deildinni í dag.

Það var markalaust í hálfleik en Kiernan Dewsbury-Hall kom Leicester yfir þegar hann skoraði með skalla þegar rúmlega stundarfjórðungur var til leiksloka.

Það var ekki fyrr en á lokamínútum venjulegs leiktíma þegar Josh Maja jafnaði metin. Varnarmenn Leicester áttu erfitt með að hreinsa boltann frá og Maja komst í boltann og potaði honum í netið.

Þessu var hins vegar ekki lokið. Leikmenn West Brom reyndu hvað þeir gátu að ná inn sigurmarkinu og voru komnir ansi framarlega á völlinn.

Það náðu Leicester menn að nýta sér og brunuðu upp í skyndisókn. Dewsbury-Hall var kominn í góða stöðu og renndi boltanum á Harry Winks sem skoraði auðveldlega og tryggði toppliðinu sigur í uppbótatíma.

Leicester er með 46 stig, fjögurra stiga forystu á Ipswich á toppi deildarinnar en Ipswich leikur gegn Coventry klukkan 15. West Brom er í 5. sæti með 32 stig.