Elvar Geir Magnússon skrifar frá Cardiff
Kolbeinn vill ná góðum sigri á morgun.
Það hefur farið vel um íslenska landsliðið í Wales þar sem það mætir heimamönnum í vináttuleik á morgun. Okkar menn gista á Vale Resort sem er hótel sérhannað fyrir íþróttafólk.
Sóknarmaðurinn Kolbeinn Sigþórsson veitti Fótbolta.net viðtal í dag og má sjá það í spilaranum hér að ofan.
„Við þurfum að skoða hvað hefur vantað í síðustu leikjum og rífa okkur upp eftir svekkelsið gegn Króatíu. Við ætlum að einbeita okkur að okkar leik og bæta það sem þarf að bæta. Við viljum ná góðum sigri á morgun," segir Kolbeinn.
„Menn vilja spila almennilegan leik hérna. Það eru margir leikmenn sem hafa lítið fengið að spila og vilja koma sér í form og sýna sig og sanna. Ég held að það verði ekkert sparað á morgun."
Kolbeinn hefur vermt varamannabekkinn hjá Ajax meira að undanförnu en hann hefði viljað.
„Ég er í fínu formi. Ég hef náð að skora mikilvæg mörk á tímabilinu og vonandi get ég bætt ofan á það. Við erum með átta stiga forystu í Hollandi og ef við náum að halda einbeitingu verðum við meistarar fjórða árið í röð."
Athugasemdir
