„Er hrikalega ánægður," sagði Rúnar Páll Sigmundsson þjálfari Stjörnunnar eftir stórsigur liðsins gegn Vestra í dag.
„Við mættum góðu liði Vestra, nýttum færin vel, fengum ekki svaka mörg en skorum fimm mörk. Héldum hreinu, hrikalega ánægður með það, heilt yfir ánægður með frammistöðuna."
Rúnar var feginn að fara með 1-0 forystu í hálfleik.
„Vestri fékk nokkur tækifæri í fyrri hálfleik, þeir hefðu getað nýtt skallafærin aðeins betur, við fórum yfir það og þéttum miðjuna aðeins. Eftir það sigldum við þessu vel í höfn," sagði Rúnar.
„Við færðum einn miðju mann aðeins aftar, Börkur var að hlaupa fram og til baka til að dekka svæði. Við vorum ekki nógu þéttir eins og við vildu, löguðum það í seinni hálfleik."
Benedikt fór hamförum í seinni hálfleik og skoraði þrennu og lagði upp eitt.
„Benedikt er frábær leikmaður, gæðin komu vel í ljós í dag. Hann getur klárað færin vel og með frábæran skotfót," sagði Rúnar.
