Aleksandar Linta nýr þjálfari ÍBV svaraði spurningum frá Tryggva Guðmundssyni eftir 1-1 jafntefli á heimavelli gegn FH í fyrstu umferð nýs deildartímabils í Bestu deildinni.
Lestu um leikinn: ÍBV 1 - 1 FH
Eyjamenn voru sterkari aðilinn í fyrri hálfleik og leiddu 1-0 en FH-ingar fengu bestu færin í síðari hálfleik. Hafnfirðingar jöfnuðu metin og komust nálægt því að gera sigurmark á lokamínútunum.
„Ég er sammála að þetta var leikur tveggja hálfleika. Ég er mjög ánægður með hvernig við spiluðum fyrri hálfleikinn, þetta var nákvæmlega það sem ég vildi sjá en fótboltaleikur er 90 mínútur. Markmiðið okkar er að spila svona vel í lengri tíma heldur en bara fyrstu 45 mínúturnar," sagði Aleksandar. „Ég er ekki sáttur með seinni hálfleikinn, við töpuðum alltof mörgum boltum og gáfum þeim mörg tækifæri til að sækja hratt á okkur. Við virkuðum stressaðir og hræddir við að spila boltanum fram á við. Við áttum að gera betur.
„Við byggjum á því góða sem við gerðum í fyrri hálfleik og reynum að laga það slæma sem við sáum í seinni hálfleiknum."
Aleksandar er ánægður með framlag sinna leikmanna og er spenntur fyrir erfiðum leik í næstu umferð, á útivelli gegn stórveldi Vals.
„Ef við endurtökum frammistöðuna úr fyrri hálfleiknum í dag þá eigum við séns gegn Val. Við verðum að nýta færin betur og verjast betur, við fengum klaufalegt mark á okkur í dag."
