Landsliðiskonan Sandra María Jessen segir íslenska landsliðið ákveðið í að ná í sín fyrstu stig þegar liðið mætir Úkraínu og Englandi í komandi heimaleikjum.
„Bara rosalega vel. Þetta er mjög spennandi verkefni báðir leikirnir. Náttúrulega fyrstu heimaleikirnir okkar áttum tvo útileiki þannig að gaman að fá að spila hérna heima fyrir okkar fólk. Við erum bjartsýnar að ná í okkar fyrstu stig í þessum leikjum.“
Hún segir liðið hafa verið fljótt að koms sér í landsliðsgírinn.
„Það er alltaf jafn gaman að hitta hópinn og koma saman. Það er einhvern veginn eins og maður hafi bara verið að æfa með þeim alltaf. Við náum strax að kúpla okkur í landsliðsgírinn og setja til hliðar það sem maður er að gera hjá félagsliðunum. Stemmingin er alltaf góð og maður veit að liðsandinn er bara góður.“
Að hennar sögn þarf liðið að treysta á sitt leikskipulag.
„Það þarf náttúrulega bara að hafa trú á verkefninu sem við erum að fara að leysa. Þetta er rosalega spennandi leikur, Úkraína er með skemmtilegt lið, þær þora að spila fótbolta og gera það af fullum krafti. Við þurfum kannski bara að setja axlirnar niður, vera rólegar með boltann og treysta því leikskipulagi sem þjálfararnir eru búnir að setja upp.“
Sandra María segir liðið hafa lært mikið af síðasta verkefni.
„Ég held að það sé varla hægt að fá erfiðari leiki en við fengum í síðasta glugga og þetta var alveg rosalega skemmtilegt að geta borið sig saman við þær hvar við stöndum.“
Hún segir enga aukna pressu á sig sem sóknarmann.
„Nei í rauninni ekki, ég er alltaf sallaróleg. Ég veit að mörkin koma til okkar, sama hvort það sé úr opnum leik eða föstum leikatriðum. Við ætlum okkur að skora og það þarf bara að setja þá kröfur á okkur að við fáum stig úr þessum leik.“
Að lokum leggur hún áherslu á mikilvægi þess að fá stuðning úr stúkunni
„Það bara skiptir öllu máli, ég held að það sé ekki hægt að undirstrika hversu mikilvægt það er að bara finna fyrir þjóðinni á bakinu á okkur. Það er 12. maðurinn á vellinum og það er bara virkilega þannig.“
Sjáðu viðtalið í heild í spilaranum hér fyrir ofan.
