Daniel Badu
Daniel Badu, þjálfari Vestra, var nokkuð sáttur með frammistöðuna í 1-0 sigrinum á Leikni í 32-liða úrslitum Mjólkurbikarsins í dag.
Lestu um leikinn: Vestri 1 - 0 Leiknir R.
Badu hrósaði framlaginu en segir Vestra hafa vantað gæðin. Hann gat þó tekið eitthvað jákvætt úr frammistöðuna.
„Hæstánægður með að hafa unnið leikinn miðað við hvernig hann spilaðist.“
„Ég var ánægður með framlagið og samheldnina, en það vantaði gæðin á köflum en klárlega hægt að taka margt jákvætt úr þessum leik,“ sagði Badu við Fótbolta.net.
Vestri mætir Gróttu í 16-liða úrslitum en hann er ekki byrjaður að pæla í þeim leik. Næsti leikur Vestra er gegn Grindavík í opnunarumferð Lengjudeildarinnar.
„Ég er ekki að hugsa of mikið út í það núna en mun gera það þegar sá tími kemur. Auðvitað betra að spila á heimavelli, en andstæðingurinn skiptir okkur engu máli.“
„Það er mikil tilhlökkun. Við höfum tvær vikur til að undirbúa okkur og hef hlakkað til þess að hafa völlinn til að æfa og allir leikmennirnir eru að komast í form þannig er spenntur að mæta Grindavík eftir tvær vikur.“
Badu, sem tók við sem aðalþjálfari Vestra undir lok síðasta árs, segist ánægður með hópinn og nú sé bara að slípa hann til fyrir Íslandsmótið.
„Ég er ótrúlega ánægður með hópinn og núna þurfa allir að leggja á vogarskálarnar. Allir eru að komast í betra form og þetta er allt að koma,“ sagði Badu í lokin.
