Rodgers: Langt frá okkar besta og okkur var refsað

Hamrarnir unnu 0-3 og áttu heimamenn í Leicester ekki eina marktilraun sem hæfði rammann.

„Þetta er bara einn af þessum dögum. Við vorum langt frá því að vera góðir og gerðum West Ham alltof auðvelt fyrir. Við vorum lélegir bæði í vörn og í sókn og þetta er svekkjandi því við hefðum getað farið inn í landsleikjahlé með fullt hús stiga," sagði Rodgers.

„Þetta er önnur lexía fyrir okkur. Við verðum alltaf að vera uppá okkar besta til að vinna. West Ham átti skilið að vinna þennan leik, þeir voru góðir en við vorum langt frá okkar besta og okkur var refsað."

Leicester er með níu stig eftir fjórar umferðir. West Ham er með sex stig eftir tvo sigra í röð. David Moyes hefur ekki verið á hliðarlínunni þar sem hann er í sóttkví.