Ítalía: Rómverjar áfram á sigurbraut

Fyrsti leikur dagsins í Serie A deildinni á Ítalíu fór fram í Róm þar sem heimamenn í Roma fengu Genoa í heimsókn.

Roma er í mjög harðri baráttu um sæti í Meistaradeild Evrópu á næstu leiktíð og er pakkinn í kringum þau sæti mjög þéttur. Genoa er um miðja deild.

Aðeins eitt mark var skorað í þessum leik og það gerði miðvörðurinn öflugi Gianluca Mancini á 24. mínútu leiksins eftir undirbúning frá fyrirliðanum Lorenzo Pellegrini.

Með þessum sigri fer Roma tímabundið upp í fjórða sæti deildarinnar en Atalanta á leik til góða.

Aðrar góðar fréttir fyrir Roma voru þær að Chris Smalling er klár í slaginn á nýjan leik eftir meiðsli en hann lék allan leikinn í vörn Rómverja í dag.