Phil Foden er búinn að gefa yfirlýsingu frá sér í kjölfar fjölmiðlaumfjöllunar vegna hegðunar hans og Mason Greenwood á Íslandi.
Þeir buðu íslenskum stelpum upp á hótel til sín, þvert gegn sóttvarnarreglum vegna Covid-19.
Upp komst um málið vegna þess að stelpurnar tóku myndbönd og birtu á SnapChat. Þaðan var myndböndunum deilt áfram og enduðu þau í höndum fjölmiðla og lögreglu.
Greenwood og Foden voru sektaðir af íslensku lögreglunni fyrir athæfi sitt og fá ekki að fara með enska landsliðinu til Danmerkur. Englendingar eru hneykslaðir á hegðun ungstirnanna sinna.
„Ég vil biðjast afsökunar á hegðun minni á Íslandi. Ég vil biðja Gareth Southgate, liðsfélagana, starfsliðið, stuðningsmennina, félagið mitt og fjölskyldu mína afsökunar," segir í yfirlýsingu Foden, sem á tveggja ára barn með kærustu sinni á Englandi.
Foden og Greenwood spiluðu báðir sinn fyrsta A-landsleik fyrir England í gær.
„Ég fylltist stolti þegar Gareth kallaði mig upp í landsliðshópinn. Það eru ótrúleg forréttindi að fá að klæðast landsliðstreyjunni. Það er mjög sárt að missa af ferðinni til Danmerkur.
„Ég er ungur leikmaður sem á eftir að læra margt. Ég tók slæma ákvörðun. Ég mun læra verðmæta lexíu af þessum mistökum og ég óska Gareth og restinni af liðinu góðs gengis í vikunni."
Foden hefur spilað 74 leiki fyrir stórlið Manchester City þrátt fyrir að vera aðeins 20 ára gamall.
Athugasemdir