Sky: Moyes búinn að ræða við Everton og gæti verið kynntur um helgina

Everton lét Sean Dyche taka poka sinn í dag eftir að hafa aðeins unnið einn af síðustu ellefu leikjum sínum.

Leighton Baines og Seamus Coleman stýra liðinu til bráðabirgða á meðan Everton leitar að arftaka Dyche, en þeir verða ekki lengi á hliðarlínunni því svo virðist sem Everton hafi fundið eftirmann Dyche.

Telegraph greindi frá því fyrr í kvöld að endurkoma Moyes kæmi til greina og gengur Sky svo langt að segja að hann gæti verið kynntur um helgina.

Moyes hefur rætt við Friedkin Group, eigendur Everton, og má vænta þess að samkomulag náist á næstu dögum.

Skoski stjórinn er goðsögn í Liverpool-borg eftir að hafa gert góða hluti með liðið frá 2002 til 2013. Hann kom liðinu í forkeppni Meistaradeildar Evrópu árið 2005 og í úrslit enska bikarsins árið 2009.

Hann stýrði síðast West Ham og vann þar Sambandsdeild Evrópu árið 2023 áður en hann yfirgaf liðið þegar samningur hans rann út eftir síðustu leiktíð.