Guðlaugur Victor Pálsson var með fyrirliðabandið er Plymouth tapaði fyrir Bolton Wanderers, 2-0, í annarri umferð ensku C-deildarinnar í dag.
Plymouth féll úr B-deildinni í vor og hefur farið illa af stað í byrjun nýs tímabils.
Það tapaði fyrir Barnsley í fyrstu umferðinni og fylgdi því á eftir með öðru tapi í dag. Guðlaugur fór af velli þegar stundarfjórðungur var til leiksloka.
Plymouth er því án stiga eftir tvær umferðir en næst mætir liðið QPR í enska deildabikarnum áður en það spilar við Lincoln í deildinni.
Jóhannes Kristinn Bjarnason kom inn af bekknum í öðrum leik sínum með danska liðinu Kolding sem vann Breka Baldursson og félaga í Esbjerg, 2-0, í B-deildinni í Danmörku. Breki kom ekki við sögu í dag.
Kolding er á toppnum með 9 stig en Esbjerg í 6. sæti með 6 stig.
Viðar Ari Jónsson kom inn af bekknum hjá Ham/Kam sem tapaði fyrir Molde, 1-0. Ham/Kam er í 14. sæti með 17 stig.
Hákon Arnar Haraldsson byrjaði þá hjá Lille sem gerði 1-1 jafntefli við West Ham í æfingaleik á London-leikvanginum.
Athugasemdir
