„Ánægður að hafa komið tvisvar til baka gegn ótrúlega sterku liði. Mér finnst hrikalega gaman að horfa á Þrótt spila fótbolta, þeir eru hrikalega góðir að halda boltanum, mikið hrós á þá," sagði Aðalsteinn Jóhann Friðriksson, þjálfari Völsungs, eftir jafntefli gegn Þrótti á Húsavík í dag.
„Fyrri hálfleikur var gríðarlega litaður að því að þeir stjórnuðu allri umferð. Við vorum lélegir að halda í boltann og fyrir vikið var þetta einstefna á boltanum en að sama skapi sköpuðu þeir ekki mikið af færum, aðallega að ógna með skotum fyrir utan teig."
„Í seinni hálfleik finnst mér leikurinn jafnast mjög mikið. Held að hann hafi verið stórskemmtilegur fyrir augað. Við vorum betri á boltanum sem gerði það að verkum að leikurinn varð opnari í báða enda, mörk og stuð, bæði lið hefðu getað stolið þessu."
Sigurvin Ólafsson, þjáflari Þróttar, taldi að seinna mark Völsungs hafi verið ólöglegt.
„Ég held að það sé ekki rétt. Ég er nátturulega hlutdrægur, ég held að það sé ekki rétt en kannski ef ég sé það aftur þá var það kannski. Það var mjög gott mark, á því augnabliki vorum við búnir að vera frábærir. Það er ótrúlegt hvað mörkin í þessum leik breyttu leiknum því þegar þeir skora tökum við yfir og þegar við skorum tóku þeir yfir og svo gerðist það einu sinni enn," sagði Alli Jói.
Völsungur fær Þór í heimsókn í næsta leik en Völsungur vann fyrri leikinn í Boganum þar sem stuðningsmenn liðsins fjölmenntu í Bogann.
„Síðasti leikur var gríðarlega skemmtilegur, það var troðfullur Boginn. Ég ætla að vona að það komi margir frá Akureyri eins og það komu margir frá Húsavík þegar við spiluðum þar. Ég ætla rétt að vona að við fjölmennum og það verði brjáluð stemning og það verður skemmtilegt. Það kryddar allt saman að geta haft svona alvöru nágrannaslagi, ég hlakka mikið til og vona að fleiri geri það líka."
