Magnús Már Einarsson, annar ritstjóra Fótbolta.net, hefur verið ráðinn sem nýr þjálfari Aftureldingar.
Hann var aðstoðarþjálfari liðsins og tekur við af Arnari Hallssyni sem sagði upp starfi sínu fyrr í haust.
Þetta var tilkynnt við vígslu nýs knatthúss við Varmá í dag. Magnús, sem er aðeins 30 ára, mun því stýra Aftureldingu í Inkasso-deildinni næsta sumar. Hann byrjar á erfiðu verkefni þar sem Mosfellingar voru aðeins stigi frá falli á nýliðnu tímabili.
Magnús lék yfir 100 leiki fyrir Aftureldingu á ferli sínum sem leikmaður. Hann spilaði einnig mikið fyrir Hvíta riddarann og kom við hjá Leikni R. og Hugin fyrir nokkrum árum.
Enes Cogic, fyrrum aðalþjálfari Aftureldingar, verður aðstoðarþjálfari Magnúsar.
