Guimaraes: Eitt af flottustu mörkum sem ég hef skorað

Brassinn skoraði tvennu í 3-2 sigri og hrósaði Eddie Howe knattspyrnustjóri honum að leikslokum. Guimaraes var sjálfur mjög kátur með sitt framlag.

„Ég er mjög ánægður, þetta var góður sigur fyrir okkur. Ég spilaði með meira frelsi á vellinum heldur en vanalega og mér leið vel. Þetta er mikilvægur sigur eftir jafnteflið gegn Luton í síðustu viku. Við spiluðum vel og þetta eru dýrmæt stig," sagði Guimaraes að leikslokum.

„Ég skoraði mjög fallegt mark, þetta er eitt af flottustu mörkum sem ég hef skorað á ferlinum. Ég vil tileinka Mad Dog (Jason Tindall, aðstoðarþjálfara Newcastle) þetta mark því við höfum verið að æfa það saman á æfingum. Ég naut mín í dag því ég fékk að spila framar en vanalega á vellinum. Að mínu mati þá get ég spilað sem sexa, átta eða tía. Þegar ég er sexa þá snýst leikurinn minn meira um að senda boltann og gefa stoðsendingar, en í dag spilaði ég sem átta og gat hjálpað með því að skora mörk."

Guimaraes er 26 ára gamall og eru ýmis félög áhugasöm um að fá hann í sínar raðir, en honum virðist líða vel í norðurhluta Englands.

„Fólk talar stundum um mig en ég tala bara á vellinum. Ég er mjög ánægður hérna og ég elska stuðningsmenn félagsins. Við þurfum að komast aftur í Evrópu, það er mjög mikilvægt. Við viljum reyna við Meistaradeildarsæti en ég veit að það er erfitt, ef það tekst ekki þá þurfum við að ná Evrópudeildarsæti. Við eigum erfiðan heimaleik í næstu umferð og þurfum að snúa okkur beint að undirbúningi fyrir hann."