Doris er hér í fjólubláu fyrir miðju. Hún er farin til Belgíu.
Markvörðurinn Doris Bačić sem leikið hefur með Einherja í sumar er gengin til liðs við belgíska liðið Anderlecht.
Hin 22 ára gamla Doris er króatísk landsliðskona og kom til Einherja fyrir tímabilið. Hún hefur spilað feykilega vel í 2. deildinni.
Anderlecht sóttist eftir að fá hana til liðs við sig og Einherji leyfði henni að fara þó tímabilinu væri ekki lokið enda stórt tækifæri fyrir Doris að færa sig yfir til Belgíu.
Doris hefur áður verið á mála hjá stórum liðum á meginlandinu. Hún var hjá Arsenal árið 2013 en fékk ekki atvinnuleyfi í Englandi og fór í kjölfarið til FC Rosengård þar sem hún náði ekki að vinna sér sæti í byrjunarliði.
Það verður gaman að sjá hvernig markmanninum mun vegna í Belgíu en það hefur verið jákvætt fyrir 2. deildina að leikmaður úr þessum gæðaflokki taki þátt.
Athugasemdir
