Alfreð skoraði sigurmarkið í kvöld.
Age Hareide, landsliðsþjálfari Íslands.
Age Hareide gat leyft sér að brosa þegar hann hitti fréttamenn eftir 1-0 dramatískan sigur gegn Bosníu í undankeppni Evrópumótsins í kvöld. Þetta var hans fyrsti sigur sem landsliðsþjálfari Íslands.
Sigurmarkið kom í uppbótartímanum en rétt áður en markið kom þá hafði Hareide lýst yfir pirringu sínum með uppbótartímann. Hann var aðeins tvær mínútur en Norðmaðurinn sagði fjórða dómaranum sína skoðun þegar skiltið fór á loft.
„Ég var reiður því þeir tóku langan tíma í skiptingar. En um leið og við skoruðum, þá sagði ég að þetta væri allt í góðu," sagði Hareide léttur. Sigurmark Íslands skoraði Alfreð Finnbogason rétt áður en flautað var til leiksloka.
Ég hata VAR
Það tók langan tíma að staðfesta að sigurmarkið væri gott og gilt, en VAR skoðaði það í þaula. Landsliðsþjálfarinn var spurður út í tilfinningar sínar á meðan verið var að skoða markið.
„Ég hata VAR, ég hata það," sagði Hareide þá ástríðufullur.
„Ég treysti dómurunum. Í leiknum gegn Portúgal þá gáfu þýsku dómararnir það til kynna að sigurmarkið þeirra væri rangstaða. Ég hefði getað fengið gult eða jafnvel rautt spjald þegar ég var að útskýra fyrir dómaranum hvernig þetta var. Það voru þrír leikmenn rangstæðir í vítateignum, eða tveir þeirra. Sá þriðji var á milli þeirra. Hinir tveir hafa áhrif á leikinn og það er maður í rútu sem tekur þessa ákvörðun. Línuvörðurinn stendur á línunni og sér augljóslega hvað gerist. Hvernig er hægt að verjast ef það er ekki dæmd rangstaða þarna? Þetta er ótrúlegt."
„Ég verð að vera hreinskilinn, ég hata VAR. Fótbolti snýst um það sem er að gerast núna, í augnablikinu. Hann snýst ekki um að bíða í fimm mínútur eftir því að fá útskýringu frá einhverjum í rútu í Reykjavík eða ég veit það ekki, í Þýskalandi. Mér líkar ekki við VAR. Ég hata VAR."
Athugasemdir
