Frábært gengi Vestra í Bestu deildinni heldur áfram en liðið vann góðan 2-0 sigur á Aftureldingu í 6. umferð deildarinnar á Kerecis-vellinum á Ísafirði í dag.

Vestri hafði sótt tíu stig úr fyrstu fimm leikjunum og bætti þremur ofan á það í dag.

Heimamenn fengu draumabyrjun er Axel Óskar Andrésson sparkaði Morten Ohlsen Hansen niður í teignum á 5. mínútu. Diego Montiel var sendur á punktinn og var hann öryggið uppmálað. Hann skaut föstu skoti í vinstra hornið. Jökull Andrésson valdi rétt horn en var ekki nálægt því að verja.

Afturelding var meira með boltann eftir markið án þess að skapa mikla hættu.

Staðan í hálfleik 1-0 fyrir Vestra en áfram héldu gestirnir að sækja í þeim síðari.

Þeir voru að reyna finna opnanir og voru farnir að nálgast jöfnunarmark þegar það kom annað mark óvænt í andlitið á þeim.

Það gerði varamaðurinn Arnór Borg Guðjohnsen í sínum fyrsta leik með Vestra síðan hann kom á láni frá FH. Morten fékk boltann inn á teiginn, lagði hann til hliðar á Arnór sem skoraði örugglega og Vestri komið í tveggja marka forystu.

Á lokamínútunum voru gestirnir nálægt því að minnka muninn í tvígang er Elmar Kári Enesson Cogic fékk boltann í miðjum teignum, en setti skot sitt í magann á Morten. Hrannar Snær Magnússon fékk annað færi í uppbótartíma en setti boltann í bakið á Gustav Kjeldsen.

Vestri hélt út og fagnaði fjórða sigri sínum á tímabilinu og er nú með 13 stig á toppnum en Afturelding í 6. sæti með 7 stig.