Írland og Wales gerðu markalaust jafntefli í B-deild Þjóðadeildarinnar í dag en Wales hefur ekki tapað leik í riðlinum.

Fyrri hálfleikurinn fer ekki í sögubækurnar fyrir skemmtanagildi en Wales vildi þó fá víti er Ethan Ampadu var tekinn niður af Darren Randolph, markverði írska liðsins. Það var þó ekkert dæmt og því flautað til loka fyrri hálfleiks.

Shane Long átti gott skallafæri fyrir Írland á 55. mínútu en boltinn fór rétt framhjá markinu. James McClean fékk að líta sitt annað gula spjald á 84. mínútu og spiluðu því Írar manni færri síðustu mínúturnar.

Wales tókst þó ekki að nýta sér það og markalaust jafntefli staðreynd en Wales er með 7 stig á toppnum í fjórða riðli B-deildarinnar á meðan Írland er í þriðja sæti með 2 stig.