Þorsteinn Halldórsson, landsliðsþjálfari A-landsliðs kvenna, er búinn að gera eina breytingu á landsliðshópinum sem mætir Wales og Þýskalandi í Þjóðadeildinni síðar í september.
Alexandra Jóhannsdóttir er miðjumaður hjá Fiorentina á Ítalíu en getur ekki verið með í næstu leikjum, líklegast vegna meiðsla. Alexandra spilaði sitthvorn hálfleikinn þegar Ísland tapaði gegn Finnum og vann svo Austurríki í æfingaleikjum í júlí, en hefur ekki spilað fótbolta síðan þar sem ítalska deildartímabilið byrjar núna um helgina.
Lára Kristín Pedersen er kölluð upp í landsliðshópinn í stað Alexöndru en Lára Kristín er mikilvægur hlekkur í sterku liði Vals.
Lára er fædd 1994 og á tvo A-landsleiki að baki fyrir Ísland eftir að hafa verið mikilvægur hlekkur upp yngri landsliðin.
Alexandra er fædd um aldamótin og á 35 A-landsleiki að baki.
